Buku na Saamakatongo
Boo go a Kontukonde. Richard Price ku Sally Price.
(Lisati ku Sali sikifi en a Saamakatongo, hen Vinije Haabo heepi seeka en ko moo gbelengbelen.)
A dee yaa 1966-1968 u bi libi a Dangogo, a Pikilio. Noo u bi tya wan fesiten teipi masini ta tei fan. Tu pasi u bi teki di masini go haika fa dee sembe bi ta sindo ta taki kontu a keewosudoo. A bi suti teee!
Moo lati hen u toona go haika dee teipi, seeka sikifi de pisisi kuma fa dee sembe bi taki dee kontu ku buka. Hen u mbei wan buku a Ingisitongo (Two Evenings in Saramaka) ku wan oto buku a Faansitongo (Deux soirées de contes saamaka). Awaa ufo u ko mbei en a Saamakatongo, bee dee tidedaka sembe sa yei fa dee avo u de bi ta taki kontu.
Dee kontu a di buku aki abi someni koti ku someni kanda. Noo a abi footoo fu someni u dee sembe bi sai de tu. Soseepi u mbei palati u gaanse u dee kontu buta a entelineti fii sa ta haika te i ta lesi di buku.
Fesiten. Richard Price (hen da Lisati).
Lisati ku Sally puu di buku a Ingisitongo ko a Saamakatongo. Vinije Haabo heepi seeka en ko moo gbelengbelen.
Di buku de a Ingisitongo sensi di yaa 1983, noo a de a Faansitongo sensi 1994. Awaa ufo u ko mbei en a Saamakatongo! (A Ingisi de kai en "First-Time," noo a Faansi a de "Les Premiers Temps.")
Hafu u di buku da dee oto fu dee gaanwomi, fa mi ku de bi sindo taki fesiten sondi a dee yaa 1960 ku 1970 — dee sembe kuma Gaama Agbago Aboikoni; Tebini fu Kampu; Kabiten Alafo fu Kambaluwa; Ameekan fu Piki Seei; Anikei Awagi fu Semoisi; Basia Bakaa ku Kabiten Bayo fu Botopasi; Kabiten Dangasi (Kala), Hedikabiten Faansisonu, Peleiki, ku Otyutyu (Belifon) fu Dangogo; Kabiten Gome fu Tutubuka; Metisen fu Langu; Basia Lantifaya fu Masiakiiki; Tembai fu Maipa; ku someni oto gaanwomi.
Hii dee Saamaka oto dee yoo lesi a di buku aki, mi bi tei de wante wante a di teipi masini mi bi abi a Saamaka. Noo, fu mbei di buku mi bi musu feni hiniwan u de a dee awoo teipi palati, bee mi sa sikifi en pisisi kuma fa di sembe bi taki en ku buka. Noo wan oto pisi u di buku ta taki fa dee bakaa bi konda dee fesiten sondi fu Saamaka.
Gaanse u dee sembe dee da mi fesiten oto an de a u mindi moo. Noo di wooko fu mbei di buku ta da tyali a di pisi de. Ma a suti da mi tu biga fesiten oto da wan gaan gaan sondi u mundu. Hen mi begi dee moo nyonku sembe, bee de go sindo ku dee gaansembe tya di wooko aki go moo fesi.